تعد اللياقة البدنية والثقافة الرياضية القوام الأساسي لسلامة الفرد والمجتمع حيث أن اللياقة البدنية تكسب الشخص الصحة والنشاط وتقلل من فرص إصابته من الأمراض كما أن الثقافة الرياضية تجعله يتعرف على المعلومات الخاصة بالرياضة.
فبحسب رحمه أحمد مدربة اللياقة البدنية يعد كلاهما غذاءً للفكر والبدن معا مشيرة إلى أن اللياقة البدنية ترمز إلى مدى صحة الإنسان وحيويته وقدرته على ممارسة التمارين الرياضية بطريقة صحيحة بينما الثقافة الرياضية هي كم المعلومات التي توجد عند الإنسان تجاه الرياضة والتصرفات الصحيحة تجاه الرياضة.
وقالت رحمه أحمد مدربة اللياقة البدنية إن هناك العديد ممن يمارسون التمارين بطرق خاطئة حتى طرق تناولهم للتغذية التي قد تكون غير صحية لذلك لا يشعر الإنسان بتحسن صحي أو عائد بدني يعود عليه صحيا أو بدنياً لذلك نبحث على ما يشعرنا بلياقتنا البدنية حتى نتحسن نفسيا ونسعى لتغير سلوكيات حياتنا أليوميه.
جاء هذا خلال الحوار الصحفي الذي أجريته مع مدربة اللياقة البدنية ” كابتن رحمه أحمد ” والتي تطرقت خلاله على الثقافة الرياضية واللياقة البدنية وفيما يلي نص الحوار الصحفي :
بداية كيف كانت بدايات كابتن رحمه أحمد باكتشاف نفسها وقدرتها على ممارسة الرياضة والمحافظة على اللياقة البدنية ؟
وانا ف ابتدائي كنت اطول وحده ف صحابي والمدرسه تبع التربية البدنية شافتني وقالتلي هتكوني كويسة معايا ف الرياضة واخدتني ف فريق المدرسة ل كرة الطايرة ودخلت الفريق وكنا بنروح مسابقات بس ف مدارس تاني وفضلت معاها لحد المتوسط ف فريق كرة الطايره وبعدها انقطعت ف الثانوي بس كان ف بالي اني اخلص الثانوي وادخل كلية تربيه رياضيه والحمد لله دخلت الكليه اللي نفسي فيها واتخصصت تدريب رياضي واتخرجت بتقدير جيد جدا الحمد لله.
كيف غيرت رحمه احمد نمط حياتها ودوره من شخصيتها بعد أن أصبحت مدربة رياضية .؟
انا فالاساس بحب المجال وكنت بسعي فيه لان اكون احسن واحسن من اللي انا عليه ف بقيت احب اشوف ايه الجديد وبقيت اهتم اكتر منً الاول وكان معايا صحبتي بتساعدني ديما ف كده.
ما أهمية التمارين الرياضية والتدريب الرياضي في تغير نمط حياة ومظهر الانسان ؟
الرياضة مهمه جدا للانسان مش بس عشان نزول الوزن لا المفروض ناخدها اولا عشان المحافظه ع صحتنا وحياتنا لانها بترتب اغلب الاشياء المتعلقه ف حياتنا زي النوم والوقت وغير كده ممارسه النشاط الرياضي بتقلل من الاصابه بالامراض وبتساعدنا نكون ف حاله مزاجيه احسن لانها بتحسن النفسيه عندنا وكمان ممكن ناخدها كترفيه زي الرقص الشرقي والزومبا لانها بتخلينا مبسوطين واحنا بنمارسها وكمان ممكن اقل مجهود هتقوم بيه هيفرق معاك زي المشي او الجري حتي لو مش هيكون طول الاسبوع مجرد انك خليت الرياضه نمط حياتك اكيد هتفرق معاك.
هل التمارين الرياضية اليومية لها أوقات معينه خلال النهار ؟
بالنسبه ل النقطه دي هو هيكون صعب ان احنا نحدد وقت معين لممارسه الرياضة لان كل واحد ليه مشغولياته لكن الشخص نفسه هو اللي يحدد ل نفسه الوقت الانسب ليه ولظروفه والوقت كمان اللي بيكون هو مستمتع فيه بالتمارين من غير اي ضغوطات.
متى يمكننا القول بأن ممارسة الرياضة والتمارين شيء أساسي بحياة الانسان ؟؟؟؟
الرياضه مهمه جدا ف حياتنا ومفيده ل صحتنا نفسيا وجسديا لانها بتساعدنا ع تقليل نسبه الدهون ف الجسم وتحسين الحاله المزاجيه لينا وبتقلل نسبه الاصابه بالمراض وبتدينا طاقه وبتساعدنا ننام كويس ونقلل نسبه الارق اللي بتحصلنا ف كده هي بتوفرلنا حياه صحيه لانها ده دورها ومفيش بديل عنها لتحسين حالتنا الصحيه والمحافظه عليها من الاصابه بالامراض المزمنه.
6. للتغذية دور هام ومرتبط بمدى اللياقة البدنية و الجسمية لكل فرد فما مدى ارتباطهما ببعض ؟
ممارسه الرياضه مهمه لانها بتحسن الدوره الدمويه ف الجسم وبتزيد من نشاط الانسان ف بتحسن الاوعيه الدمويه والشرايين وبتقلل الاصابه بامراض القلب وكمان بتساعد ف زياده نبضات القلب وتدفق الدم المحمل بالاكسجين والعناصر الغذائيه اللي بيحتاجها الجسم عشان يمدنا بالطاقه اللازمه وعلشان ده يحصل لازم يكون اكنلنا صحي ومناسب ويكون فيه كميه كافيه من الطاقه الحراريه عشان الشخص ميحسش بالجوع او الارهاق اثناء التمرين ، ويكون الاكل سهل الهضم ، ويبتعد عن المشروبات الغازيه قبل التمرين لانها مدره للبول ، ويشرب كميه كافيه من السوايل حتي اثناء التمرين لتعويض الفاقد من الجسم .. ونصيحه ديما بنقولها تناول الاكل قبل التمرين بوقت كافي لتجنب الغثيان او آلآم المعده لان التمرين بعد الوجبه مباشره بيخلي الدم بينتقل من المعده او القناه الهضميه للعضلات لمساعدتها ع الحركه اثناء التمرين.
هل الطعام المصنع الذي نتناوله له علاقة بتخزين الدهون بالجسم وخاصة منطقة البطن ؟
دي مشكله اغلب الاشخاص هي تكدس الدهون ف منطقه البطن اكتر من اي مكان تاني وصعوبه التخلص منها ف كل م اكنا اطعمه مصنعه او خارجيه زي الاطعمه المقليه زادت الفرصه ان الدهون تتخزن ف مناطق معينه ف الجسم وخاصه البطن وفي ناس بتعتقد انها لو امتنعت عن الاكل هتفقد الدهون وده اعتقاد خاطئ لان الجسم بيحتاج للطعام لحرق الدهون اما الامتناع عن الطعام بيقلل نسبه حرق الدهون لان الجسم مش بيلاقي اللي يحرقه.
8.هل توجد دهون صحيه ام ان كل الدهون ضارة للجسم ؟؟؟
طبعا في دهون صحيه وغيرها ضاره الدهون المشبعه هي اللي بتكون ضاره ل الجسم بس ده ف حاله اننا اخدنا كميه اكبر من احتياجنا منها وزياده عن النسبه اللي بيحتاجها الجسم ، اما الدهون غير المشبعه مفيده ، والدهون مفيده كمان وبيحتاجها الجسم لانها هي اللي بتمد الجسم بالطاقه اللي بيحتاجها وبيكون فيها فوايد لان بعضها بيحتوي ع فيتامينات ذائبه ف الدهون زي فيتامين .أ . د . ه.
هل بالفعل يوجد علاقة بين تنظيم الطعام الصحي إلى جانب التمارين الرياضية؟
طبعا في علاقه بينهن لو انا اكلت كويس قبل التمرين وبفتره كافيه هقدر امارس التمارين بشكل كويس ومرضي عكس لو ماكلتش كويس هيكون في خمول وكسل وممكن احس بدوخه اثناء اداء التمارين.
10. كيفية تغير أسلوب حياة البعض من خلال المنزل دون تكلفة عالية ؟
انك تغير حياتك او النمط اللي ماشي عليه بقالك فتره طويله ممكن يكون سهل او صعب بس الشخص نفسه هو اللي بيتحكم ف ده واول خطوه هي ان اكون عاوز التغيير ده من جوايا ومقتنع بيه مش مجرد اني هجرب وخلاص وممكن لو الامكانيات مش متاحه مجرد اني انزل امشي ساعه ف اليوم اظبط اكلي ووجباتي اللي بتناولها ده ف حد ذاته تغير وهيفرق مع اي حد.
ماهي النصائح التى توجهها المدربة رحمه لمن يسعى لفقد الدهون ؟
الاول لازم يكون عندي اراده من جوايا انا عاوزه اعمل الحاجه دي واولا اني اقلل كميه الاكل اللي بتناولها لاني مهما مارست الرياضه وانا باكل كميات كبيره مش هوصل ل اللي محتاجاه مهما عملت وكمان اشرب مويه كتير عشان جسمي بيحتاجها وانظم اكلي واكل ف اوقات محدده وانام كويس وبشكل كافي يحتاجه جسمي.
ما هي المواقف الصعبة التي واجهت الكابتن رحمه خلال ممارسة عملها كمدربة لياقة ، وكيف تخلصت منها ؟
مفيش حاجه اقدر اقول عليها صعبه الحمد لله لاني بالي طويل جدا وبحاول علي قد م اقدر اوصل الشخص اللي قدامي ل اللي محتاجه سواء من اسئله او من تمارين او اي حاجه محتاجها بفضل الله.
ما هو الحلم المنتظر لكابتن رحمه والذي لم يتحقق حتى الان ؟
١٢.ممكن حلمي ان اشوف الناس كلها بتقدر الرياضه وقيمه اللي احنا بنعمله ومتبقاش شايفه اللي بيمارس الرياضه ده مجرد شخص فاضي وبيضيع وقته وكمان تغير وجهه نظرها عن المدربين ويفهموا اننا برضو بنتعب مش علشان احنا اللي بنمرن غيرنا نبقي مبنتعبش وكمان تقدر شغلنا ميتفهوش منه وطبعا ف كميه كبيره واصلها ده بس لسه مش كل الناس.
اخيرا.
ندعو الله سبحانه وتعالى ان يحقق لكي المزيد من النجاح و التفوق في جميع امورك، و أن يستفيد الآخرين من خبراتك الصحية والرياضية التي تسهم بلا شك في تحقيق السعادة لكل من يحلم بالرشاقة واللياقة البدنية .